ಚುನಾವಣೆಗಳು ಇಲ್ಲದೆ ಪ್ರಜಾ ಪ್ರಭುತ್ವವಿಲ್ಲ. ಮಾಧ್ಯಮಗಳು ಇಲ್ಲದೆ ಚುನಾವಣೆಗಳು ಇಲ್ಲ. ಆದ್ದರಿಂದ ಪ್ರಜಾಪ್ರಭುತ್ವ, ಚುನಾವಣೆಗಳು ಮತ್ತು ಮಾಧ್ಯಮ ಒಂದಕ್ಕೊಂದು ನಿಕಟ ಸಂಬಂಧ ಹೊಂದಿವೆ.
ಮತದಾರರ ತೀರ್ಮಾನಗಳು ಅಥವಾ ಆಯ್ಕೆಗಳು ಅವರಿಗೆ ಲಭ್ಯವಿರುವ ಮಾಹಿತಿಯ ಮೇಲೆ ಅವಲಂಬಿಸಿವೆ. ಪ್ರಜಾಪ್ರಭುತ್ವದಲ್ಲಿ ಜನರು ತಮ್ಮ ಮುಕ್ತವಾದ ಅಭಿಪ್ರಾಯಗಳನ್ನು ವ್ಯಕ್ತಪಡಿಸಬೇಕಾದರೆ ಮಾಹಿತಿ ಬಹಳ ಮುಖ್ಯವಾಗುತ್ತದೆ.
ಇಂದು ಮತದಾರರು ಮಾಹಿತಿಯನ್ನು ಪಡೆಯುತ್ತಿರುವುದು ಮುಖ್ಯವಾಗಿ ಮೂರು ಮೂಲಗಳಿಂದ. ಅವುಗಳೆಂದರೆ :
1. ದಿನಪತ್ರಿಕೆಗಳು
2. ಟಿ.ವಿ. ಚಾನಲ್ಗಳು
3. ಸಾಮಾಜಿಕ ಜಾಲತಾಣ
ಪ್ರತಿದಿವಸ ಸುಮಾರು 8500 ದಿನಪತ್ರಿಕೆಗಳು 100 ಭಾಷೆಗಳಲ್ಲಿ ಪ್ರಕಟವಾಗುತ್ತಿವೆ. ನೂರಾರು ಚಾನಲ್ ಗಳಿಂದ ಮತದಾರರು ಮಾಹಿತಿಯನ್ನು ಪಡೆಯುತ್ತಿದ್ದಾರೆ. ಇವುಗಳ ಜೊತೆಗೆ ಕಳೆದ 10 ವರ್ಷಗಳಲ್ಲಿ ಸೋಷಿಯಲ್ ಮೀಡಿಯವು ಸಹ ದೊಡ್ಡ ಪ್ರಭಾವ ಬೀರಿದೆ. ಸುದ್ದಿ ಮಾಧ್ಯಮ ಮತ್ತು ಚಿತ್ರ ಮಾಧ್ಯಮಗಳು ಜನಾಭಿಪ್ರಾಯವನ್ನು ರೂಪಿಸಬಲ್ಲ ಶಕ್ತಿಯನ್ನು ಪಡೆದುಕೊಂಡಿವೆ.
ಚುನಾವಣೆಗಳ ಸಮಯದಲ್ಲಿ ಮಾಧ್ಯಮಗಳ ಪ್ರಮುಖ ಕರ್ತವ್ಯವೆಂದರೆ:
- ಮತದಾರರಿಗೆ ಶಿಕ್ಷಣವನ್ನು ನೀಡಬೇಕು.
- ಸರ್ಕಾರದ ಕಾರ್ಯ ಸಾಧನೆ, ವೈಫಲ್ಯ ಇತ್ಯಾದಿಗಳ ಬಗ್ಗೆ ವರದಿಯನ್ನು ನೀಡಬೇಕು.
- ಪ್ರಜಾಪ್ರಭುತ್ವದ ಚೌಕಟ್ಟಿನಲ್ಲಿ ಆರೋಗ್ಯಕರ ಚರ್ಚೆಗೆ ಮಾಧ್ಯಮಗಳು ವೇದಿಕೆಯಾಗಬೇಕು.
- ಒಟ್ಟಾರೆ ಚುನಾವಣಾ ಪ್ರಕ್ರಿಯೆಗಳ ಬಗ್ಗೆ ಕಣ್ಣಾವಲಿಟ್ಟು ಕೆಲಸ ಮಾಡಬೇಕು.
ಚುನಾವಣೆಗಳಲ್ಲಿ ಜನಸಾಮಾನ್ಯರ ಸಮಸ್ಯೆಗಳಾದ ಬಡತನ, ಶಿಕ್ಷಣ, ಆರೋಗ್ಯ ಉದ್ಯೋಗ, ಕೃಷಿ ಬಿಕ್ಕಟ್ಟು, ಕೈಗಾರಿಕಾ ಬಿಕ್ಕಟ್ಟು ಇತ್ಯಾದಿ ವಿಷಯಗಳು ಚರ್ಚೆಗೆ ಬರುತ್ತಿಲ್ಲ. ಬದಲಿಗೆ ಬದುಕಿಗೆ ಅಗತ್ಯವಿಲ್ಲದ ವಿಷಯಗಳಾದ ಮಂದಿರ-ಮಸೀದಿ, ಮತಾಂತರ, ಸಮಾನ ಸಿವಿಲ್ ಕೋಡ್, ಅನುಚ್ಛೇದ 370, ಪೌರತ್ವ ಕಾಯಿದೆ ಇತ್ಯಾದಿಗಳು ಆದ್ಯತೆ ಪಡೆಯುತ್ತಿವೆ. ದೇಶ ಎದುರಿಸುತ್ತಿರುವ ಸಮಸ್ಯೆಗಳ ಮತ್ತು ಸವಾಲುಗಳ ಬಗ್ಗೆ ಮಾಧ್ಯಮಗಳು ಚರ್ಚೆ ನಡೆಸುವ ವೇದಿಕೆಯಾಗಬೇಕು. ವಿವಿಧ ರಾಜಕೀಯ ಪಕ್ಷಗಳು ಮತ್ತು ರಾಜಕಾರಣಿಗಳು ಈ ದೇಶದ ಸಮಸ್ಯೆಗಳನ್ನು ಯಾವ ರೀತಿ ಪರಿಹರಿಸುತ್ತಾರೆ ಮತ್ತು ಸವಾಲುಗಳನ್ನು ಯಾವ ರೀತಿ ಹಿಮ್ಮೆಟ್ಟಿಸುತ್ತಾರೆ ಎಂಬುದಾಗಿ ತಿಳಿಯಪಡಿಸುವ ವೇದಿಕೆಯಾಗಬೇಕು.
ಆದರೆ ದೇಶದಲ್ಲಿ ಇಂದು ಮಾಧ್ಯಮಗಳು ಸೇವಾ ಕ್ಷೇತ್ರದಿಂದ ದೂರ ಸರಿದು ವ್ಯಾಪಾರೀಕರಣವಾಗುತ್ತಿದೆ. ಹಣ ಗಳಿಕೆಯೇ ಮುಖ್ಯ ಗುರಿಯಾಗಿದೆ. ಹೆಚ್ಚು ಹಣ ಗಳಿಸಲು ಹೆಚ್ಚು ಪ್ರಸರಣ ಸಂಖ್ಯೆಯು ಅಗತ್ಯ ಅನಿವಾರ್ಯವಾಯಿತು. ಇದಕ್ಕಾಗಿ ಕೀಳು ಮಟ್ಟದ ಅಭಿರುಚಿಗಳಾದ ಕ್ರೈಂ, ಸೆಕ್ಸ್ ಮತ್ತು ರೋಚಕ ಸುದ್ದಿಗಳನ್ನು ಪತ್ರಿಕೆಗಳಲ್ಲಿ ತುಂಬಲಾಗುತ್ತಿದೆ. ಅನೇಕ ಸಂದರ್ಭಗಳಲ್ಲಿ ಬಣ್ಣ ಬಳಿದುಕೊಂಡ, ತಿರುಚಲ್ಪಟ್ಟಿರುವ ಹಾಗೂ ಸತ್ವ ಕಳೆದುಕೊಂಡ ಸುದ್ದಿಯನ್ನು ಜನಸಾಮಾನ್ಯರಿಗೆ ನೀಡಲಾಗುತ್ತಿದೆ. ಪತ್ರಿಕೋದ್ಯಮ ಒಂದು ಸವಾಲಾಗಿ ನಮ್ಮ ಮುಂದಿದೆ. ಮಾಧ್ಯಮ ಇಂತಹ ಪರಿಸ್ಥಿತಿಯಿಂದ ಹೊರಬಂದರೆ ಮಾತ್ರ ಮುಕ್ತವಾದಂತಹ ಚುನಾವಣೆಗಳು ನಡೆಯಲು ಸಾಧ್ಯ. ಮುಕ್ತವಾದ ಮತ್ತು ಪಾರದರ್ಶಕವಾದ ಚುನಾವಣೆಗಳು ಪ್ರಜಾಪ್ರಭುತ್ವವನ್ನು ಗಟ್ಟಿಗೊಳಿಸಲು ಸಾಧ್ಯ.