ಮಾನವ ಬಂಧುತ್ವ ವೇದಿಕೆ - ಕರ್ನಾಟಕ

ರಾಜ್ಯದ ಎಲ್ಲಾ ಜಿಲ್ಲೆಗಳನ್ನು ಆರು ವಿಭಾಗಗಳಾಗಿ ವಿಂಗಡಿಸುವ ಜೊತೆಗೆ ಪ್ರತಿ ವಿಭಾಗಕ್ಕೆ ಒಬ್ಬ ಸಂಚಾಲಕರನ್ನು ಆಯ್ಕೆ ಮಾಡಿ ಅವರಿಗೆ ಸಂಘಟನಾ ಜವಾಬ್ದಾರಿಯನ್ನು ವಹಿಸಲಾಗಿದೆ. ಅಲ್ಲದೆ ಜಿಲ್ಲೆ ಮತ್ತು ತಾಲೂಕು ಮಟ್ಟದಲ್ಲಿ ಪೂರ್ಣಾವಧಿ ಹಾಗೂ ಅರೆಕಾಲಿಕ ಕಾರ್ಯಕರ್ತರು ವೇದಿಕೆಯನ್ನು ಸಂಘಟಿಸುವ, ಕಾರ್ಯಕ್ರಮ ಮತ್ತು ಚಟುವಟಿಕೆಗಳನ್ನು ನಡೆಸುವ ಕಾರ್ಯಭಾರವನ್ನು ನಿಭಾಯಿಸುತ್ತಾರೆ. ಒಟ್ಟು 6 ಹಂತಗಳ ಕಾರ್ಯನಿರ್ವಹಣಾ ವ್ಯವಸ್ಥೆಯ ಮೂಲಕ ವೇದಿಕೆಯು ಪರಿಣಾಮಕಾರಿಗಾಗಿ ಕಾರ್ಯನಿರ್ವಹಣೆಯನ್ನು ಮಾಡುತ್ತದೆ.

ಹಂತ 1: ರಾಜ್ಯ ಕಾರ್ಯಕಾರಿ ಮಂಡಳಿ

ಹಂತ 2: ವಿಭಾಗೀಯ ಸಂಚಾಲಕರು

ಹಂತ 3: ಜಿಲ್ಲಾ ಸಂಚಾಲಕರು ಮತ್ತು ಜಿಲ್ಲಾ ಸಮಿತಿ

ಹಂತ 4: ತಾಲೂಕು ಸಂಚಾಲಕರು ಮತ್ತು ತಾಲೂಕಾ ಸಮಿತಿ

ಹಂತ 5: ಗ್ರಾಮ ಘಟಕಗಳು

ಮಹಿಳಾ ಬಂಧುತ್ವ ವೇದಿಕೆ ಮತ್ತು ಮಹಿಳಾ ಬಂಧುತ್ವ ವೇದಿಕೆಗಳು ರಾಜ್ಯ, ಜಿಲ್ಲೆ ಮತ್ತು ತಾಲೂಕು ಮಟ್ಟದ ಸಮಿತಿಗಳನ್ನು ಹೊಂದಿರುತ್ತವೆ. ರಾಜ್ಯ ಕಾರ್ಯಕಾರಿ ಮಂಡಳಿ ಮತ್ತು ರಾಜ್ಯ ಸಮಿತಿಯು ಎಲ್ಲಾ ಹಂತಗಳ ಸಮಿತಿಗಳು ಮತ್ತು ಪೂರ್ಣಾವಧಿ ಕಾರ್ಯಕರ್ತರು ನಿರ್ವಹಿಸಬೇಕಾದ ಹೊಣೆಗಾರಿಕೆಗಳ ಕುರಿತು ಕಾಲ–ಕಾಲಕ್ಕೆ ಅಗತ್ಯವಿರುವ ಸೂಚನೆ ಮತ್ತು ಮಾರ್ಗದರ್ಶನವನ್ನು ನೀಡುತ್ತದೆ.

ಸಂಘಟನಾ ವಿಭಾಗವು ದೈನಂದಿನ ಚಟುವಟಿಕೆಗಳಿಗೆ ಮಾರ್ಗದರ್ಶನ ನೀಡುವುದಲ್ಲದೆ ಮೇಲ್ವಿಚಾರಣೆ ಮತ್ತು ಅನುಸರಣೆಯನ್ನೂ ಮಾಡುತ್ತದೆ. ಪ್ರಚಾರ ಮಾಧ್ಯಮಗಳನ್ನೆಲ್ಲ ಸಂಪನ್ಮೂಲಗಳನ್ನಾಗಿ ಬಳಸಿಕೊಂಡು ಸಂಘಟನೆಯ ಆಶಯ, ಉದ್ಧೇಶಗಳಿಗೆ ವ್ಯಾಪಕ ಪ್ರಚಾರವನ್ನು ನೀಡುತ್ತದೆ. ಜನಸಮುದಾಯದಲ್ಲಿ ವೇದಿಕೆಯ ಕುರಿತು ಆಸಕ್ತಿ ಮತ್ತು ಸದಾಶಯವನ್ನು ಮೂಡಿಸುವಲ್ಲಿ ಈ ವಿಭಾಗದ ಪಾತ್ರ ಮಹತ್ವದ್ದಾಗಿದೆ.

ಮೇಲಿನ ಎಲ್ಲಾ ಆಶಯಗಳನ್ನು ಕಾರ್ಯರೂಪಕ್ಕೆ ತರುವ ಕಾರ್ಯಕ್ಷಮತೆ, ದಕ್ಷತೆ ಮತ್ತು ಸೈದ್ದಾಂತಿಕ ಬದ್ಧತೆಯನ್ನು ತಂಡದ ಎಲ್ಲಾ ಹಂತಗಳ ಕಾರ್ಯಕರ್ತರಲ್ಲಿ ಮೂಡಿಸುವಲ್ಲಿನ ನಮ್ಮ ಯಶಸ್ಸು ಸಂಘಟನೆಯ ಯಶಸ್ಸಿಗೂ ಕಾರಣವಾಗುತ್ತದೆ. ಎಲ್ಲಾ ಹಂತಗಳ ಕಾರ್ಯಕರ್ತರು ಮತ್ತು ಸಮಿತಿಗಳ ಪದಾಧಿಕಾರಿಗಳು ಈ ಅವಕಾಶವನ್ನು ಒಂದು ವೃತ್ತಿಯಾಗಿ ಪರಿಗಣಿಸದೆ ಒಂದು ಹೊಣೆಗಾರಿಗೆಯಾಗಿ ನಿಭಾಯಿಸಬೇಕು. ಸಾಮಾಜಿಕ ಪರಿವರ್ತನೆ ಮತ್ತು ಮಾನವೀಯವಾದ ವೈಚಾರಿಕ ಸಮಾಜ ನಿರ್ಮಾಣ ಮಾಡಲು ತಮಗೆ ಸಿಕ್ಕಿದ ಅವಕಾಶವನ್ನು ಸದುಪಯೋಗ ಮಾಡುವ ಬದ್ಧತೆಯನ್ನು ತೋರಿಸಬೇಕು. ಇಂತಹ ಬದ್ಧತೆಯನ್ನು ಕಾರ್ಯಕರ್ತರಲ್ಲಿ ಮೂಡಿಸುವ ಸವಾಲು ನಮ್ಮ ಮುಂದಿದೆ. ಈ ಸವಾಲಿನಲ್ಲಿ ನಾವು ಗೆಲುವನ್ನು ಸಾಧಿಸಿದರೆ ಮಾತ್ರ ನಮ್ಮ ಮುಂದಿರುವ ಗುರಿಯನ್ನು ಈಡೇರಿಸಲು ಸಾಧ್ಯ ಎನ್ನುವ ಎಚ್ಚರಿಕೆ ನಮ್ಮಲ್ಲಿದೆ. 

ಈ ಹಿನ್ನಲೆಯಲ್ಲಿ ವೇದಿಕೆಯು ಪೂರ್ಣಾವಧಿ ಮತ್ತು ಅರೆಕಾಲಿಕ ಕಾರ್ಯಕರ್ತರ ದೊಡ್ಡ ಪಡೆಯನ್ನು ಸಜ್ಜುಗೊಳಿಸುತ್ತಿದೆ. ಈ ಕಾರ್ಯಕರ್ತರಿಗೆ ಕಾಲಕಾಲಕ್ಕೆ ಅಗತ್ಯವಿರುವ ತರಬೇತಿಗಳನ್ನು ನೀಡಿ ಅವರ ಸಾಮರ್ಥ್ಯವನ್ನು ಹೆಚ್ಚಿಸುವ, ಕಾರ್ಯಕ್ಷಮತೆಯನ್ನು ಮೊನಚುಗೊಳಿಸುವ ಕಾರ್ಯವನ್ನು ವೇದಿಕೆಯ ಕಾರ್ಯಕಾರಿ ಮಂಡಳಿಯು ರೂಪಿಸಿದೆ.

ಪ್ರಸ್ತುತ ನಮ್ಮ ರಾಜ್ಯ ಮತ್ತು ದೇಶದಲ್ಲಿ ಎದುರಾಗಿರುವ ರಾಜಕೀಯ ವಿದ್ಯಮಾನಗಳನ್ನು ನೋಡಿದಾಗ “ಮಾನವ ಬಂಧುತ್ವ ವೇದಿಕೆ”ಯು ನಮ್ಮ ಮುಂದಿರುವ ಚಾರಿತ್ರಿಕ ಅವಶ್ಯಕತೆಯಾಗಿದೆ. ಮತೀಯ ಮೂಲಭೂತವಾದಿಗಳು ಮತ್ತು ಲಾಭಕೋರ ಕಾರ್ಪೋರೇಟ್ ವ್ಯಕ್ತಿಗಳು ತಮ್ಮ ಸ್ವಾರ್ಥಕ್ಕಾಗಿ ಜನಮನದಲ್ಲಿ ಸೃಷ್ಟಿಸಿರುವ ಭ್ರಮೆಗಳಿಂದ ಅವರನ್ನು ಹೊರತರಲು ಬೃಹತ್ತಾದ ವೈಚಾರಿಕ ಚಳುವಳಿಯನ್ನು ಕಟ್ಟದೆ ಬೇರೆ ದಾರಿ ಕಾಣುತ್ತಿಲ್ಲ. ದೇಶದ ಜನಸಂಖ್ಯೆಯಲ್ಲಿ ಶೇ. 10ನ್ನು ಕೂಡಾ ದಾಟದ ಈ ಸ್ಥಾಪಿತ ಹಿತಾಸಕ್ತಿಗಳು ಜನರ ಒಲವು–ನಿಲುವುಗಳನ್ನು ತಮ್ಮ ಅವಶ್ಯಕತೆಗೆ ಅನುಗುಣವಾಗಿ ಬದಲಾಯಿಸಿ ಪ್ರಭುತ್ವವನ್ನೇ ಹಿಡಿತದಲ್ಲಿ ಇಟ್ಟುಕೊಂಡಿರುವ ಈ ಸಂದರ್ಭ ಬಹುಜನರ ಒಗ್ಗೂಡುವಿಕೆಯ ಅನಿವಾರ್ಯತೆಯನ್ನು ಸಾರಿ ಸಾರಿ ಹೇಳುತ್ತಿದೆ. ಆದರೆ ನಾವು ನಮ್ಮ ಸಂಘಟನೆಗಳು ಮತ್ತು ನಮ್ಮ ಜನರು ಸೈದ್ಧಾಂತಿಕ ಭಿನ್ನಾಭಿಪ್ರಾಯ ಎನ್ನುವ ಹುಸಿವಾದದ ಬೆನ್ನು ಹತ್ತಿದ್ದಾರೆ. ಅಂಬೇಡ್ಕರವಾದಿಗಳು, ಗಾಂಧೀವಾದಿಗಳು, ಲೋಹಿಯವಾದಿಗಳು, ಮಾರ್ಕ್ಸ್ ವಾದಿಗಳು ಮತ್ತು ಮಾನವತಾವಾದಿಗಳು ತಮ್ಮ ತಮ್ಮ ಶ್ರೇಷ್ಠತೆಯ ವ್ಯಸನದಲ್ಲಿ ಕಳೆದುಹೋಗುತ್ತಿದ್ದಾರೆ. ಈ ದೌರ್ಬಲ್ಯವನ್ನು ಬಳಸಿಕೊಂಡು ಮತೀಯ ಮೂಲಭೂತವಾದಿ ಶಕ್ತಿಗಳು ವಿಜೃಂಭಿಸುತ್ತಿವೆ. ಫ್ಯಾಸಿಸಮ್ ಅನ್ನು ಕರಾಳ ನೆರಳು ನಮ್ಮ ನಾಡನ್ನು ಆವರಿಸಿಕೊಳ್ಳುತ್ತಿದೆ. ಈ ದೇಶದ ಸಂವಿಧಾನ ಮತ್ತು ಪ್ರಜಾಪ್ರಭುತ್ವ ಗಂಭೀರವಾದ ಅಪಾಯಕ್ಕೆ ಸಿಲುಕಿದೆ. ಈಗಲಾದರೂ ನಮ್ಮ ಜನರು ವಾಸ್ತವವಾಗಿ ಯೋಚಿಸಲು ಮತ್ತು ನಿರ್ಧಾರಗಳನ್ನು ಕೈಗೊಳ್ಳಲು ಸಿದ್ಧರಾಗಬೇಕು. ವಿಶಾಲ ತಳಹದಿಯ ಪ್ರಜಾಪ್ರಭುತ್ವವಾದಿ ರಾಜಕೀಯ ಶಕ್ತಿಯನ್ನು ಕಟ್ಟುಲು ಸಾಧ್ಯವಾಗಬೇಕು. ನಮ್ಮ ಒಗ್ಗೂಡುವಿಕೆ ಇಂದು ಸಾಮಾಜಿಕ ಮತ್ತು ರಾಜಕೀಯ ಚಳುವಳಿಯಾಗಿ ಪರಿವರ್ತನೆಯಾಗಬೇಕು. ಇದು ಸಾಧ್ಯವಾದಾಗ ಮಾತ್ರ ಶೋಷಿತ ಜನಸಮುದಾಯದಗಳ ಹಿತಾಸಕ್ತಿಗಳು ಪ್ರಭುತ್ವದ ಮುಖ್ಯವಾಹಿನಿಗೆ ಬರಲು ಸಾಧ್ಯವಾಗುತ್ತದೆ.

ನಮ್ಮ ಮುಂದಿರುವುದು ಸುಲಭದ ದಾರಿಯಲ್ಲ. ಆದರೆ ಮುನ್ನಡೆಯಲೇಬೇಕು. ಬುದ್ಧ, ಬಸವ, ಅಂಬೇಡ್ಕರ್, ಗಾಂಧಿ, ಲೋಹಿಯಾ, ಮಾರ್ಕಸ್, ಪೆರಿಯಾರ್, ನಾರಾಯಣಗುರು, ಕುವೆಂಪು ಮೊದಲಾದ ದಾರ್ಶನಿಕರು ಸೃಷ್ಟಿಸಿದ ದರ್ಶನಗಳ ಬೆಳಕಿನಲ್ಲಿ ನಮ್ಮ ಹೆಜ್ಜೆಗಳು ಸಾಗಬೇಕು. ಹೀಗೆ ಸಾಗುವ ನಮ್ಮ ಹೋರಾಟ ದಾರಿ ನಮ್ಮೆಲ್ಲರನ್ನೂ ಕಲ್ಯಾಣ ಕರ್ನಾಟಕದ ಸಾಕಾರದ ದಿಕ್ಕಿಗೆ ಒಯ್ಯಲಿದೆ. ಇಂತಹ ದೃಢವಿಶ್ವಾಸದಿಂದ ಮಾನವ ಬಂಧುತ್ವ ವೇದಿಕೆ ಹೆಜ್ಜೆ ಇಡಲಿದೆ.